nome científico
Galego
Etimoloxía: de nome e científico.
Pronuncia: /ˈnome̝θjɛnˈtifiko̝/ (AFI)
Locución substantiva masculina
nome científico (sg: nome científico; pl: nomes científicos)
- (Bioloxía) Denominación, en latín científico, dunha especie biolóxica (ser vivo), e de calquera taxon, seguindo as normas oficiais establecidas por institucións como, para vexetais (incluíndo fungos e cianobacterias) a ICBN (International Code of Botanical Nomenclature); para animais (incluíndo potistas) a ICZN (International Code of Zoological Nomenclature); para bacterias, o ICNB (International Code of Nomenclature of Bacteria); para plantas cultivadas, o ICNCP (International Code for Cultivated Plants), e para virus, o ICTV (International Committee on Taxonomy of Viruses). Todos eles seguindo os principios establecidos por Linné, o fundador da taxonomía moderna (que inclúe a nomenclatura), nas súas obras Systema Naturae e Species Plantarum.
Observacións
- Os nomes científicos dos diferentes taxons (agás xénero e especie) son plurais e, ao seren latinos, escríbense en letra cursiva, e sempre con inicial maiúscula, que pasa a minúscula e con letra redonda ao seren adaptados á lingua vulgar romance, aínda que hoxe en día hai unha tendencia (se cadra por influencia do inglés, que non adapta os termos latinos) a escribilos en redonda, e en latín sen adaptar; por exemplo, Filicopsidae, Dicotiledoneae, Malvales, Rosaceae, Arthropoda, Ruminantia, Felidae, etc.; no canto de Filicopsidae (filicópsidas), Dicotiledoneae (dicotiledóneas), Malvales (malvales), Rosaceae (rosáceas), Arthropoda (artrópodos), Ruminantia (ruminantes), Felidae (félidos), etc. Un caso especial preséntao o nome dunha especie, para o que se emprega a nomenclatura binomial (tamén establecida por Linné), na que se escriben o nome do xénero, (sempre con inicial maiúscula) e o da especie (sempre con inicial minúscula, aínda que se refira a un nome propio, por exemplo, Vipera seoanei, a víbora de Seoane), e sempre en cursiva (aquí, até en inglés ou en alemán); hai que ter en conta que xénero e especie deben concordar gramaticalmente entre si (o nome específico será masculino, feminino ou neutro, segundo o sexa o xénero). Ás veces cómpre empregar a nomenclatura trinomial, caso de incluír o subxénero, que se escribe con maiúscula e entre parénteses, a continuación do xénero, ou a subespecie, ás veces tamén a variedade, que se escriben en minúscula detrás do nome específico (no caso da variedade intercalando a abreviatura var., de varietas), por exemplo Felis (Leptailurus) serval (o serval, un gato africano) e Felis (Profelis) aurata (o gato dourado, outro gato africano); Salmo trutta trutta (o reo) e Salmo trutta fario (a troita) ou Pediculus humanus var. capitis (o piollo da cabeza) e Pediculus humanus var. corpore (o piollo do corpo), respectivamente.
- Podes atopar os nomes científicos do Galizionario nunha categoría específica.